Author Archives for Sigliwa

kung malimutan ko na ang mga titik

kung malimutan ko nang
sumulat ng tula’t salaysay–
alalahanin kita sa aking gunita
doon ko na lamang itititik
pangamba’t panaginip
na pinagsaluhan natin
noong marunong pang
humabol sa buwan at mga bituin
sa araw, sa mga kometa’t mga buntala
sa kalawakan ng papel at computer screen.

kung malimutan ko nang bumaybay
sa makitid na tulay ng katotohana’t imahinasyon
hahaplusin kita sa dako pa roon
sa pagitan ng tibok at tigil ng puso
sa bawat sargo at daloy ng dugo
sa bawat kinig ng laman at litid
sa bawat paghigop, pagbuga ng maikling hininga.

kung malimutan ko na ang panitik,
pakikipaghabulan sa titik na bulisik –
ilalapida ko sa aking kaluluwa
mga salitang maaaring tuluyang malimutan na –
pagmamahal, pagkatakot, pagsuyo
pangamba, pagkabasag, pagkabuo
nitong buong pagkatao.
sa lapidang iyon isusulat, pangalan mo
ang pinakamagandang akdang
nabasa ng puso’t kaluluwa ko…

Memoriam

Hinaplos ko ng palad
Ilang piraso ng ala-ala
Taglay mukha mong kupas
Nakatatak sa pilas ng aking diwa.

Tinahak ng mga daliri
Bawat guhit at gurlis
Idinampi sa mga labi
Iyong pakla at tamis.

Ay! Limutin mang pilit
Parang hamog sa umaga
Sa dahon ng gunita’y hahalik
Ngunit tuksong mawawala
Lulukso sa langit
Kapag hinagkan ng kawalang init…

Si Atty. Edwin Lacierda at ang mito ng pagtaas ng presyo ng langis

Atty. Edwin Lacierda (indolentindio.com)

HINDI KO maiwasang mamangha sa mamang na pinakabibig ng Malakanyang.

Sabi niya, napaka-inconsistent ng grupong PISTON [Pagkakaisa ng mga Samahan ng Tsuper at Operators Nationwide] dahil nagpoprotesta ito sa pagtaas ng presyo ng langis, naggigiit na tanggalin ang value-added tax [VAT] sa mga produktong petrolyo, at nananawagan para sa pagsasabansa ng industriya na kinopo ng tatlong dambuhalang kompanyang Chevron, Shell at Petron — na ang huli’y dating pag-aari ng gobyerno na ipinagbili noong 1994 sa Aramco at simula noon, ang kalbaryo ng mga mamamayan sa taas-baba [na mas malamang ang pagtaas kaysa pagbaba] ng presyo ng langis, subalit ngayon ay naghain na rin ng kanilang petisyon ng taas-singil sa pasahe. [Nga pala, habang inia-update natin ang blog na ito, nagdagdag na ang Land Transportation Franchising and Regulatory Board o LTFRB ng singkuwenta sentimos (50¢) sa pasahe o minimum fare].

Pero, hindi ito ang laman ng ating munting diskurso kundi ang ilang kabalintunaan sa posisyon ng gobyerno hinggil sa pigil-taas sa presyo ng langis. Continue reading →

kuwaresma

abo sa abo:

noo’t buong katawan
babalik sa pinagmulan–
lupang yayapos sa kamatayan.

ngunit gaano ka nga ba kahanda
na harapin ang ‘yong tadhana?

ngayong panahon ng pagninilay
at mga araw ng pagtitika’y
ihanda ang sarili sa pagyapos
sa tadhanang ang buhay ay kapos
subalit hindi rito natatapos.

tanong na dapat maalam ang sagot:
saan mo ibig?
sa paraiso o sa walang hanggang pagkalapnos?

Piyesta

HINDI MAHULUGANG-karayom ang bawat sulok at kalye ng Quiapo. Parang tubig-baha ang hugos ng mga taong nakabiyuletang damit, nakapaa, at may pasang sariling imahen ng Nazarenong Negro. Halata ang pagod at puyat, subalit hindi alintana ang nakapapasong init ng araw na pilit pinapawi ng sasampung pisuhing inuming nabili sa bangketa, sa pagpahid sa pawis gamit ang panyolito o labakarang napipintahan ng larawan ng Kristong namamawis ng dugo at bakas sa mukha ng hirap… Continue reading →

Bagong Taon

matapos pagpagan
alikabok sa hangin
ng mga kuwitis at halakhak
magsisimula nang kumumpis
dahon ng kalendaryong hawak.
luha’y namamalisbis
saklot ng tuwa at lumbay
bawat naghahangad
ng magandang buhay
ngayong taong bago na naman.
ngunit ang pait ng taong nagdaan
nananatili ang lasa sa bibig ng kaluluwa
libingang nagnganga
kalungsura’t kanayunan
pabrika’t kaparangan
dahil bukas ng marami’y
hawak ng iilang sukaban.
ngunit naghahangad pa rin
umaasam pa rin
na sa pagkalagas ng dahon
ng mga buwan at taon
ay sasapit din ang araw
na makawawala rin
sa pagkaparool.